Բոլիվուդյան՝ «Մերժվածը» հետռուստասերիալը հայ հեռուստադիտողի ամենասիրելի նախագծերից է դարձել, իսկ այնտեղի հերոսներին քննարկում են ամենուր` տանը, դրսում, համացանցում, աշխատավայրում… Այդ է պատճառը, որ NEWS.am STYLE-ը հաճախ է անդրադառնում ֆիլմի դերասաններին, սակայն այսօրվա մեր անակնկալը առանձնահատուկ է եւ այն հատկապես կհետաքրքրի հեռուստասերիալում Վանշին մարմնավորող Ռոհիտ Խուրանայի երկրպագուներին: Մեզ հաջողվեց կապ հաստատել դերասանի հետ եւ զրուցել տարբեր թեմաների` Վանշի կերպարի, «Մերժվածը» հեռուստասերիալի, Հայաստանի, հայ երկրպագուների եւ հայ կանանց մասին: Ի դեպ, դերասանն անակնկալ ունի հայաստանյան երկրպագուների համար: Մանրամասներն ընթերցեք ստորեւ.

-Ռոհիտ, գիտեմ, որ Ձեր կարիերան սկսել եք որպես մոդել, իսկ այսօր Բոլիվուդի ամենահայտնի ու պահանջված դերասաններից եք: Ի սկզբանե դերասան դառնալու մտադրություն ունեի՞ք:

-Այո, ես սկսել եմ որպես մոդել` աշխատելով մի շարք հայտնի բրենդների հետ, սակայն, ինչ խոսք, իմ իրական երազանքը դերասան դառնալն էր: Ես գիտեի, որ մոդելինգը ուղի կհարթի ինձ համար դեպի սերիալային աշխարհ: Այդ է պատճառը, որ ես զբաղվեցի մոդելինգով, իսկ հետո սկսեցի աշխատել դերասանության վրա: Շնորհակալ եմ Աստծուն, որ վերջին տարիների ընթացքում ինձ բաժին են հասնում շատ կարեւոր դերեր, որոնց համար մարդիկ ինձ սիրում են:

-Դուք շատ հեռուստասերիալներում եւ ֆիլմերում եք նկարահանվել, բայց աշխարհի տարբեր ծայրերում Ձեզ ավելի շատ ճանաչրում են որպես «Մերժվածը» հեռուստասերիալի Վանշ: Ո՞րն էր, ըստ Ձեզ, այդ կերպարի հաջողության գաղտնիքը:

-Ես եւ համաձայն եմ ասվածի հետ, եւ ոչ այնքան…Մարդիկ ինձ շատ հեռուստասերիալներում են տեսել, բայց, այո, Վանշը դարձել է իմ հոմանիշը, եւ մարդիկ Հայաստանում ինձ գիտեն որպես Վանշ: Իսկ Հնդկաստանում ինձ շատ ուրիշ դերերով են ճանաչում: Բացի սերիալներից` նաեւ ֆիլմերում եմ նկարահանվում: Օրինակ` Singh VS Kaur ֆիլմը շատ մեծ արձագանք ունեցավ, թեեւ ես այնտեղ բացասական կերպար էի մարմնավորում: Ընկերներս ու մտերիմներս գիտեն նաեւ իմ հումորային կողմերը: Դրա շնորհիվ ինձ առաջարկել են նկարահանվել Men will be Men կատակերգությունում: Ես միշտ փորձում եմ կերտել տարբեր դերեր:

-Շատ մարդկանց գիտեմ, ովքեր տխրել էին, երբ Վանշը հեռուստասերիալում մահացավ… Ինչպե՞ս կարողացաք այդքան կարճ ժամանակահատվածում գերել միլիոնավոր հեռուստադիտղների սրտեր:

-(Ծիծաղում է): Այո, Վանշը կարեւոր մարդ էր ոչ միայն հեռուստադիտողների, այլեւ ինձ համար: Նա կոտրեց այն կարծրատիպը, թե եթե դու չարագործ ես, ուրեմն պետք է հենց այդպիսին էլ մահանաս:

Իմ կերպարը բացասական էր, նա թմրամոլ էր: Ես Մումբայի տարբեր հատվածներում եմ եղել, որպեսզի ծանոթանամ թմրամոլների հետ, հասկանամ նրանց: Հետո այդ փորձը ես կիրառեցի իմ խաղի մեջ, որպեսզի այն դարձնեմ ավելի իրական: Իսկ հետո Իչան փոխեց Վանշին` նրան ավելի դրական դարձնելով: Իմ կերպարը բազմակողմանի էր… նա գիտեր ատել, բարկանալ, սիրել եւ հոգ տանել: Իսկ նրա վաղաժամ մահը սցենարով էր նախատեսված: Միգուցե, ռեժիսորն ինձ չէր սիրում եւ ցանկանում էր շուտ ազատվել ինձանից: Սա, իհարկե, կատակ է: Ճիշտ է` հեռուստասերիալում իմ կերպարը մահացավ, բայց նա ապրեց հազարավոր սրտերում: Դա ինձ համար ավելի կարեւոր է:

-Իրականում Դուք, կարծես թե, նման չեք Վանշին: Դուք շատ դրական եք: Հե՞շտ էր այդքան բացասական մարդու մարմնավորելը:

-(Ծիծաղում է): Դե լավ, արդարացի չէ նրան այդքան վատը համարելը: Նա դրական կողմեր էլ ուներ: Նա շատ էր սիրում Իչային, հոգ էր տանում նրա մասին, պաշտպանում էր նրան: Այսինքն` չի կարելի ասել, թե նա անսիրտ էր: Մարդիկ երեւի կարծում են` հեշտ է բացասական կերպար խաղալը, բայց դա այդպես չէ: Դու պետք է ներկայացնես մեկին, որն ընդհանրապես քեզ նման չէ եւ ստիպված պետք է բոլորից շատ փորձեր անես: Ինձ դուր էր գալիս Վանշի պարզությունը, անկեղծությունը եւ նրա պայքարը` խավարի դեմ:

-Իսկ ընդհանրություններ ունե՞ք նրա հետ:

-Այո, նախ` մենք արտաքնապես ենք նման, բացի դա` ես էլ եմ կյանքում շատ դժվարությունների միջով անցնում, որոնք ստիպված եմ հաղթահարել: Վանշի պես՝ ես էլ երբեք չեմ հանձնվում:

-Կցանկանայի՞ք, որ Ձեր երեխաներն էլ շարունակեին Ձեր ուղին (Ռոհիտը երկու երեխա ունի):

-Անկեղծ ասած` երբեք չեմ մտածել այդ ուղղությամբ: Իմ ծնողներն իրենց կամքը ինձ չեն պարտադրել, ես էլ չեմ ստիպի ինչ-որ բան իմ երեխաներին: Այդ որոշումը նրանք պետք է կայացնեն, իսկ ես եւ իմ կինը միշտ պատրաստ ենք նրանց աջակցել:

-Գիտեի՞ք, որ այսքան հայտնի եք Հայաստանում: Հայ ընկերներ ունե՞ք:

-Հայաստանի եւ Հնդկաստանի միջեւ բարեկամությունը պատմությունից է գալիս: Մեր երկու ազգերը միշտ էլ բարեկամներ են եղել: Այս փաստն, իհարկե, ինձ միշտ հայտնի էր, բայց այն, որ ես այդքան ճանաչված եմ Հայաստանում, չգիտեի…Ես այնքան շնորհակալ եմ բոլորից: Այո, Հայաստանում ունեմ ընկերներ: Նույնիսկ PR մենեջեր ունեմ այդտեղ, որի հետ ծրագիր ենք քննարկում Հայաստանում աշխատելու վերաբերյալ: Այնպես որ` միգուցե ինձ այստեղի նախագծերում էլ տեսնեք:

Ռոհիտն ու Վարդան Սարգսյանը, որն, ի դեպ, նկարահանում է ունեցել դերասանի հետ

-Ի՞նչ կմաղթեք Ձեր հայ երկրպագուներին:

-Ուզում եմ ասել` շարունակեք դիտել «Մերժվածը» հեռուստասերիալն ու սիրել մեզ ու Հնդկաստանը:

-Ռոհիտ, Հայաստանում այս օրերին կանանց մեկամսյակն են տոնում: Համոզված եմ` շատ հայ կանայք եւ աղջիկներ շնորհավորանք կցանկանային ստանալ հենց Ձեզանից:

-Այնքան ուրախ եմ, որ Հայաստանում ուղիղ մեկ ամիս նշում են կանանց տոնը: Կարծում եմ` նրանց համար ամեն օրը պետք է տոն լինի: Կանայք իմ կյանքում միշտ մեծ տեղ են զբաղեցրել` մայրս, կինս, այժմ նաեւ` դուստրս:

Հայ կանանց ուզում եմ մաղթել, որ ամրապնդեն իրենց կյանքը, ավելի կայանան իրենց գործում եւ հավատան սեփական ուժերին, որովհետեւ նրանք բոլորն էլ կարեւոր են: Շարունակեք սիրել ձեր շրջապատում բոլորին, որովհետեւ ձեր ուժը ձեր հոգատարության մեջ է: