Ինչու են ձեռքերը թմրում քնած ժամանակ

Շատերն են արթնանում ձեռքերի թմրածության տհաճ զգացումով։ Սա հատկապես զայրացնում է, եթե պարբերաբար կրկնվում է։ Steptohealth.ru կայքը գրում է, որ ձեռքերը թմրում են մի քանի պատճառներով։

• Դաստակային նյարդ։ Խոսքը նյարդի հետ կապված խնդրի մասին է. այս դեպքում դաստակի վրա ուժեղ ճնշում է լինում, ինչը հանգեցնում է ցավի կամ թմրածության՝ սահմանափակելով դաստակի կամ մատների շարժումը։ Պարզապես գիշերային ժամերին բոլոր զգացմունքները սրվում են, ինչը մեզ համար շատ տհաճ է դառնում։

• Աշխատանքային ծանրաբեռնվածություն։ Երբեմն ինքներս մեզ շատ ենք ծանրաբեռնում։ Գործունեության այնպիսի տեսակները, ինչպիսիք են համակարգչի դիմաց աշխատանքը, կարելը, սարքերի հետ կապված աշխատանքը, կարող են հանգեցնել նրան, որ ձեռքերի նյարդերը չկարողանան դիմանալ այս ծանրաբեռնվածությանը։ Այս ամենի արդյունքում դաստակի հատվածում ցավ է առաջանում, որը, բնականաբար, գիշերը սրվում է. նյարդերն այդ ժամանակ փորձում են «թուլանալ» և թոթափել ծանրաբեռնվածությունը։

• Հեղուկի կուտակում։ Ավելորդ քաշը, ֆիզիկական վարժությունների բացակայությունը և սխալ սնունդը կարող են հանգեցնել այտուցների առաջացման ոչ միայն՝ ոտքերի, այլև՝ ձեռքերի հատվածում։ Այս ամենը տեղի է ունենում օրգանիզմում հեղուկի կուտակման պատճառով։ Գիշերային ժամերին այս ամենը մեզ ավելի է անհանգստացնում, քանի որ արյան շրջանառությունը դանդաղում է, ճնշումը՝ մեծանում, դրա հետ միասին մեծանում է նաև անհարմարության զգացումը։

• B խմբի վիտամինների պակաս։ Սխալ սնունդ օգտագործելու պատճառով մենք օրգանիզմին չենք ապահովում անհրաժեշտ քանակի վիտամիններով։ B խմբի վիտամինների պակասը կարող է հանգեցնել որոշակի հետևանքների, սակայն մենք հաճախ դրանց անհրաժեշտ ուշադրություն չենք դարձնում։ Կարծում ենք, թե պարզապես հոգնել ենք՝ չմտածելով անգամ, թե ինչի հետևանք է մեր վիճակը։ Հոգնածությունը, քնկոտությունը, մաշկի գունատությունը, հաճախասրտությունը, ինչպես նաև ձեռքերի և ոտքերի թմրելն այս դեպքում հանդիպող նշաններ են։