Վանեցյանը մտել է Ռուբեն Հայրապետյանի տարածք
Դիտումներ ` 1019
Անհավատալի է, բայց Հայաստանի ֆուտբոլի ֆեդերացիայի նախագահ Ռուբեն Հայրապտյանի հրաժարականի հարցը կարծես թե լուծված է: Ֆուտբոլասեր հանրության հոծ զանգվածներ, որոնք վերջին տարիներին դժգոհ էին Ռուբեն Հայրապետյանի նախագահությունից ու վստահ, որ ազգային հավաքականի գրեթե չգոյությունը պայմանավորված է հենց Հայրապետյանի անձով ու նրա հաստատած բարքերով, որի մասին մամուլը տարիներ շարունակ բարձրաձայնել է,իհարկե, վաղուց էր բարձրաձայնում ՀՖՖ ղեկավարին փոխելու անհրաժեշտության մասին, սակայն նա ամուր կառչած էր իր աթոռին եւ ամեն նման առիթով հեգնում էր, թե իր հրաժարական պահանջողները պատվեր կատարողներ են: Սակայն թավշյա հեղափոխությունը անցավ նաեւ ՀՖՖ-ով ու հրաժարական կներկայացնի նաեւ Հայրապետյանը:
Ի դեպ, հարկ է նշել, որ դեռեւս շաբաթներ առաջ Նիկոլ Փաշինյանը ուղիղ եթերներից մեկի ժամանակ այս խնդրին անդրադառնալով ասել էր, թե հույս ունի, որ կկայանա այնպիսի ընտրություն, որը և՛ ֆուտբոլասերների, և՛ ֆեդերացիայի սրտով կլինի: Մեկնաբանելով վարչապետի հայտարարությունը ՀՖՖ նախագահը օրեր անց միայն ասել էր, թե համակարծիք է վարչապետի հետ, նույն օրը Հայրապետյանն իր հրաժարականի պահանջին ի պատասխան ասում էր, որ ՀՖՖ նախագահ չի դառնա միայն այն դեպքում, եթե ֆուտբոլային հանրությունը չցանկանա դա. «Ի՞նչ ա նշանակում՝ ֆեդերացիայի նախագահ ես ընտրվում և ֆուտբոլային հանրության ցանկությունը չկա։
Ուղղակի ծիծաղելի է։ Կամ ձեզ թվում է՝ ես էդքան կառչա՞ծ եմ ֆեդերացիայի նախագահի պաշտոնից, ամեն գնով պիտի ասեմ՝ գիտե՞ք ինչ, ժողովուրդն ինձ չի ուզում, բայց ես պարտադիր պիտի մնամ։ Չարաչար սխալվում եք, հաստատ տենց չի»։
Հիշեցմանը, որ երկրպագուները բազմաթիվ ակցիաներ են կազմակերպել իր հրաժարականի պահանջով, Հայրապետյանն արձագանքը եղել էր այն՝ շատ լավ գիտի ակցիաների կազմակերպիչներին ու վստահ է, որ նրանք մեծամասնություն չեն կազմում․ «Էդ երկրպագուները նորմալ, ազնիվ տղերք են։ Նրանց միջից մի երկու հոգու հրահրեցին, տենց սարքեցին։ Իհարկե, եթե երկրպագուները չուզեն, գնալու եմ»:Ռուբեն Հայրապետյանը ֆեդերացիան ղեկավարում է 2002 թվականից: Հհուլիսի 17-ին, ՀՖՖ գործկոմի հերթական նիստում նա գործկոմի անդամների առաջ ելույթ է ունեցել, ասելով, թե չի բացառվում, որ կհեռանա, եթե ՀՖՖ նախագահի արժանի թեկնածու առաջադրվի: Ժողովից հետո լրատվամիջոցների հետ զրույցում ավելի էր բացել խաղաքարտերը՝ ասելով, որ եթե ԱԱԾ պետ Արթուր Վանեցյանն առաջադրվի, ինքը չի առաջադրվի:
Իշխանության նախընտրելի թեկնածուն Վանեցյանն է, սակայն, թե ինչ առնչություն ունի հայկական ֆուտբոլի հետ, որեւէ մեկին հայտնի չէ, Ռուբեն Հայրապետյանն ինքն էլ չի բացատրում, թե ինչով է Վանեցյանի թեկնածությունն ընդունելի իր համար, նա ընդամենը երկյուղած ներկայացնում է հրաժարականի վճիռը՝ պարզ դարձնելով, որ որոշումն ինքնին կայացվել է նույն մթնոլորտում: Փաստորեն, Նիկոլ Փաշինյանի համար որեւէ ինստիտուտի հարցում ներում-բեկում չի գործում, հաշվի չի առնվում շատ կարեւոր մի հանգամանք, թե ում-ով է փոխարինվում Հին Հհայաստանի պաշտոնյան, արդյոք նորերը համապատասխանում են պահանջվող չափանիշներին, թե գործում է ով մեզ հետ չէ, տականք է սկզբունքը:
Վանեցյանին իր մասկի-շոուներով դարձրել է մեր ժամանակների հերոսը, չնայած երկրի բուն անվտանգության խնդիրներին նրա զրո ուշադրությանը ու կարեւորը երկրորդականին ստորադասելը, դրանով հանդերձ նոր իշխանությունը համարում է, որ Վանեցյանը վաստակել է իրավունք ֆուտբոլային աշխարհից հեռո լինելով դառնալ ՀՖՖ նախագահ: Քանզի ոչ յուրայինների չեզոքացման օպերացիան Նիկոլ Փաշինյանի կառավարությունում իրականացվում է Վանեցյանի ձեռամբ:
Անի Սահակյան
