Սպանեցին Արմեն Ամիրյանին
Դիտումներ ` 2577
Երբ սույն թվականի սեպտեմբերի 27-ին ՀՀ նախագահ Սերժ Սարգսյանի հրամանագրով Արմեն Ամիրյանը նշանակվեց ՀՀ Մշակույթի նախարար՝ հանրության ոգևորությունը իսկապես մեծ էր:
Մարդիկ ուրախ էին, որ վերջապես նախարար է նշանակվել ոլորտի գիտակ, իշխանական թալանին չմասնակցած և բարի համբավ ունեցող անձնավորությունը: Ամենատպավորիչն այն էր, որ երբ Արմեն Ամիրյանը դուրս էր գալիս կառավարության առաջին նիստից, կառավարության դիմաց հավաքված բողոքավոր քաղաքացիները սկսեցին ծափահարել և դրական խոսքեր ասել Արմեն Ամիրյանի մասին:
Եվ ահա չանցած շատ ժամանակ Արմեն Ամիրյանին հանրությունը արդեն իսկ սվիններով է դիմավորում: Երեկ մայրաքաղաքի կենտրոնում պայթեցվեց 20-ական թվականներին կառուցված տպարանի առաջին շենքը: Այսօր երբ լրագրողները փորձել են հետաքրքրվել, թե ինչ կարծիք ունի Ամիրյանը տեղի ունեցածի մասին՝ նա ասել է, որ շենքն իրականում այդքան էլ արժեքավոր չէր:
Այս հայտարարությունից հետո ամենաբացասական մեկնաբանություններն են հնչում Արմեն Ամիրյանի գործունեության մասին: Իհարկե պետք է փաստել, որ Ամիրյանն ինքը, որպես մարդ շարունակում է մնալ հարգարժան և որպես մշակույթի գործիչ նա հարգանքի է արժանի, սակայն որպես Մշակույթի նախարար նա արդեն իսկ տանուլ տվեց:
Նա պարտվեց գործող համակարգին: Ամենալավ և ամենագիտակ անձը անգամ անգործության է մատնվում ստեղծված համակարգում:
Պետք է փաստել, որ համակարգն արդեն իսկ «սպանեց» Արմեն Ամիրյանին և սա դեռ շարունակվելու է: Ու չզարմանաք, եթե մի օր էլ կառավարության դիմաց հավաքված նույն բողոքավորները սուլոցներով դիմավորեն նրան:
