Սարսափելի դեպք Դադիվանքում. ինչպես են այրվել 7 ամսական զույգ երեխաները. մանրամասներ
Դիտումներ ` 976
Արցախի Դադիվանք գյուղում ողբերգական դեպք է տեղի ունեցել. տանը բռնկված հրդեհի հետևանքով այրվել են 7 ամսական զույգ երեխաները, հրդեհի պահին 4 երեխաները տանը մենակ են եղել:
Արցախի Դադիվանք գյուղում ողբերգական դեպքը տեղի է ունեցել երեկ` փետրվարի 22-ի առավոտյան, 9։30-ին։ Այս մասին Sputnik Արմենիային հայտնեցին Արցախի Շահումյանի շրջանի ԱԻ վարչությունից։
Բաժնի պետ, փոխգնդապետ Սամվել Խաչիկյանը, որ անձամբ է մասնակցել փրկարարական աշխատանքներին և հրդեհված տնից դուրս բերել այրված երեխաների մարմինները, Sputnik Արմենիային պատմեց, որ երեխաների հայրը գյուղական դպրոցի ուսուցիչ է։ Նա առավոտյան գնացել է աշխատանքի, իսկ մայրը երեխաների հետ տանն է եղել։
Բացի 7 ամսական զույգերից, տանը նաև ընտանիքի մյուս երկու երեխաներն են եղել` 3 տարեկան տղան և 5 տարեկան աղջիկը։
«Մայրը քնած փոքրիկներին ու արթուն 2 երեխաներին թողել է տանը, ինքը դուրս եկել` հարևանի տուն սուրճ խմելու, թե ինչ-որ այլ գործերով։ Հենց այդ ժամանակ էլ հրդեհը բռնկել է»,- ասաց Խաչիկյանը։
Նա նաև նշեց, որ նախնական վարկածով, տանը ցուրտ է եղել, 3 տարեկան տղան փորձել է կրակայրիչով վառել վառարանը, ինչն էլ հրդեհի բռնկման պատճառ է դարձել։
«2 ավագ երեխաները հրդեհի պահին եղել են նախասրահում։ Նրանց կարողացել են արագ դուրս բերել, իսկ փոքրիկները քնած են եղել ներսի սենյակում, այդ պատճառով չի հաջողվել նրանց փրկել»,- ասաց ԱԻ փոխգնդապետը։
Դեպքի առիթով հարուցվել է քրեական գործ։ Ընթանում է նախաքննություն։
https://armeniasputnik.am/incidents/20180223/10663300/dadivanq-erexa-hrdeh.html
