Ծանոթին բռնացրել է ընկերուհու հետ նույն անկողնում՝ խանդից այնքան է ծեծել, որ թոքը «պայթել է»
Դիտումներ ` 738
Մալաթիա-Սեբաստիա վարչական շրջանի ընդհանուր իրավասության դատարանում Ռոբերտ Պապոյանի նախագահությամբ ավարտվել է Արտուշ Շախկուլյանի գործի դատական քննությունը:
29-ամյա Արտուշ Շախկուլյանին մեղադրանք էր առաջադրվել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:
Շախկուլյանը կալանքի տակ է 2016 թվականի հուլիսի 29-ից:
Ըստ դատական ակտի՝ 2016 թվականի հուլիսի 22-ին, ժամը 22-ի սահմաններում Արտուշն իր ընկերուհու՝ Լենայի (անունը փոխված է) հետ զբոսնել է Մալաթիա-Սեբաստիա վարչական շրջանի թաղապետարանի մոտ գտնվող այգում:
Այնտեղ Արտուշը պատահական հանդիպել է իր ծանոթ Համբարձումին, նրան հրավիրել է իր վարձակալած տուն՝ ժամանակ անցկացնելու:
Տանը Արտուշը, նրա ընկերուհի Լենան ու Համբարձումը միասին խմել են մոտ 1,5 լիտր օղի: Բայց հյուրընկալության ամբողջ ընթացքում Արտուշը զգացել է, որ Համբարձումը սիրահետում է Լենային:
Որոշ ժամանակ անց Լենան հայտարարել է, թե լավ չի զգում, ու գնացել է ննջասենյակ՝ քնելու:
Արտուշն էլ ասել է, թե օղին վերջացել է, գնում է խանութ՝ օղի գնելու: Սակայն կասկածները նրան հանգիստ չէին տալիս: Նա տնից դուրս է եկել, բայց խանութ չի գնացել, այլ մի քանի րոպե անց անսպասելի վերադարձել է տուն:
Տեսել է, որ Համբարձումը հյուրասենյակում չէ: Գնացել է ննջասենյակ ու տեսել է, որ Համբարձումը պառկել է Լենայի կողքին ու արձակում է վերնաշապիկի կոճակները:
Արտուշ Շախկուլյանը զայրացել ու Համբարձումին քաշելով դուրս է բերել բակ, հարցրել է, թե ի՞նչ էր անում իր ընկերուհու կողքին պառկած, ապտակել ու հայհոյել է, ինչին ի պատասխան Համբարձումը նույնպես հայհոյել է: Դրանից Արտուշն ավելի է ջղայնացել, ոտքերով ու ձեռքերով հարվածներ է հասցրել Համբարձումին, գցել է գետնին, այնքան է խփել, որ առաջացրել է թոքի սալջարդ, դեմքի շրջանի վնասվածքներ՝ նրա առողջությանը պատճառելով ծանր վնաս:
Այդ ամենից հետո Արտուշը պահանջել է, որ Համբարձումը հեռանա ու այլևս չերևա իրենց կողմերում:
Համբարձումը մի քանի քայլ հեռացել և ուժասպառ ընկել է: Մարդիկ շտապօգնություն են կանչել, Համբարձումը տեղափոխվել է հիվանդանոց, նրա կյանքը փրկվել է:
Առաջադրված մեղադրանքում Արտուշ Շախկուլյանը դատարանում իրեն մեղավոր չի ճանաչել: Նա հայտնել է, թե տուժողին ծեծել է իրեն հայհոյելու պատճառով, նրա առողջությանը ծանր վնաս չի պատճառել:
Շախկուլյանը հրաժարվել է դատարանում ցուցմունք տալուց:
Դատաքննության ընթացքում հնարավոր չի եղել ապահովել տուժող Համբարձումի ներկայությունը: Դատարանը բազմաթիվ որոշումներ է կայացրել տուժողին բերման ենթարկելու մասին, սակայն դատարանի որոշումներն ի կատար չեն ածվել, ոստիկանությունը պատասխանել է, թե Համբարձումի գտնվելու վայրն անհայտ է:
Նախաքննական ցուցմունքում տուժողը հայտնել է, թե Արտուշի տանը գնացել է ննջարան ու պառկել է Լենայի կողքին, որ քնի, բայց Արտուշը եկել, գոռգոռացել է, իրեն քաշելով դուրս է բերել ու հարվածներ է հասցրել ոտքերով և ձեռքերով: Նա իր հասցեին հայհոյանքներ է տվել, հետո էլ պահանջել է, որ ինքը հեռանա: Ինքն ուժասպառ քայլել է մոտ 100 մետր և ընկել է: Անծանոթ մարդիկ շտապօգնություն են կանչել, իրեն տեղափոխել են հիվանդանոց, որտեղ ինքը տեղեկացել է, որ Արտուշ Շախկուլյանի հարվածների հետևանքով «պայթել է» իր աջ թոքը:
Վկա Լենա Ի.-ն հայտնել է, թե Համբարձումին, ում ինքը որպես «Համո» գիտի, ճանաչել է մոտ մեկ տարի: Գիտի, որ Համոն Շահումյանում էր ապրում վարձով, ինքն այդ տանը մի անգամ Համոյի հետ սեռական հարաբերություն է ունեցել: Դա միակ անգամն է եղել, Արտուշը դրա մասին չի իմացել…
Դեպքի օրը ինքը տղաների հետ օղի է խմել Արտուշի վարձած տանը, որտեղ մոտ մեկ ամիս ապրում էր Արտուշի հետ: Իրեն վատ է զգացել, գնացել է քնելու: Արտուշը գնացել է խանութ, իսկ Համոն մնացել է սեղանի մոտ նստած:
Քնած ժամանակ ինքը զգացել է, որ ինչ-որ մեկը պառկել է իր կողքին, ենթադրել է, որ Արտուշը կլինի: Հետո քնել ու ոչ մի բան չի լսել:
Երբ արթնացել է, տանը միայն ինքն ու Արտուշն էին: Ինքը չի իմացել, որ Արտուշը ծեծել է Համոյին, որ շտապօգնությունը Համոյին տարել է հիվանդանոց:
Դեպքից մոտ քսան օր հետո Համոյին տեսել է այգու դիմաց, այդ ժամանակ Արտուշն արդեն կալանքի տակ էր: Թոքի պատռվածքի մասին իրեն Համոն է ասել: Ինքը մանրամասները չի հիշում, քանի որ ուժեղ խմած է եղել…
Արտուշ Շախկուլյանը հայտարարել է, թե իրականում կին ունի և իր խնամքին են երկու անչափահաս երեխաներ…
Շախկուլյանը նախկին դատվածություններ ևս ունի: Հիմնականում դատվել է գողությունների համար, նույնիսկ Սոչիում է դատվել ու պատիժ կրել, բայց այլ երկրում դատվածությունը իրավական հետևանք չի առաջացրել, տվյալ գործով դատական ակտի կայացման պահին Շախկուլյանը համարվել է դատվածություն չունեցող անձ:
Այն պահին, երբ Արտուշ Շախկուլյանը խանդի հողի վրա ծեծում էր իր ծանոթ Համբարձումին, նրա վերաբերյալ քրեական գործ էր քննվում՝ գողության փորձի մեղադրանքով: Իսկ երբ տուժողի առողջությանը ծանր վնաս հասցնելու մեղադրանքով Շախկուլյանն առնվել էր կալանքի տակ, որոշ ժամանակ անց Էրեբունի և Նուբարաշեն վարչական շրջանների ընդհանուր իրավասության դատարանի՝ 2016 թվականի դեկտեմբերի 5-ի դատավճռով գողության փորձի համար՝ ՀՀ քրեական օրենսգրքի 34-177 հոդվածի 2-րդ մասի 1-ին կետով, Շախկուլյանը դատապարտվել է 2 տարի 6 ամիս ազատազրկման:
Մալաթիա-Սեբաստիա վարչական շրջանի ընդհանուր իրավասության դատարանը Արտուշ Շախկուլյանին մեղավոր է ճանաչել տուժող Համբարձումի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով, և դատապարտել է 4 տարի 6 ամիս ազատազրկման: Այս պատժին մասնակիորեն գումարվել է Էրեբունի և Նուբարաշեն վարչական շրջանների առաջին ատյանի դատարանի դատավճռով նշանակված պատժի չկրած մասից մեկ տարի ազատազրկումը:
Արտուշ Շախկուլյանը վերջին հաշվով դատապարտվել է 5 տարի 6 ամիս ազատազրկման:
Պատժի սկիզբը՝ 2016 թվականի հուլիսի 29-ից:
