Փաշինյանի վտանգավոր օպերացիան Արցախում՝ «դուրս արի փողոց» սպառնալիքով
Դիտումներ ` 848
Արցախում չորս օր ընթացող բողոքի ակցիաներին երեկ երեկոյան ֆեյսբուքյան ուղիղ եթերում անդրադարձավ Նիկոլ Փաշինյանը՝ կոչ անելով դադարեցնել ցույցերը և հնարավորություն տալ իշխանություններին իրագործել ձեռք բերված պայմանավորվածությունները:
«Այս պահին ճիշտ կլինի, որ ցուցարարները գնդակը թողնեն Արցախի իշխանությունների դաշտում», ասաց նա, ընդգծելով, որ իրավիճակը պետք է հանգուցալուծվի ոչ թե կոնֆլիկտի, այլ համաձայնության մթնոլորտում: Հիշեցնենք, դրա նախորդ օրը Հայաստանի առաջին նախագահ Լևոն Տեր-Պետրոսյանն էր կոչ արել Փաշինյանին միջամտել՝ Ղարաբաղում ներքաղաքական կայունությունը վերականգնելու համար:
Ահա, Փաշինյանն ասում է. «Իհարկե, ուժային կառույցների պահվածքը մտահոգություններ առաջացնող է, եթե չասենք դատապարտելի է»: Ապա, նա հավելում է, որ իրավիճակը պետք է կոնկրետ լուծումներ ստանա ու կոնկրետ հետևությունների բերի. «Ես ուշիուշով հետևում եմ Արցախի իրադարձություններին, մշտական կապի մեջ եմ եղել Արցախի նախագահ Բակո Սահակյանի հետ և գոհունակությամբ եմ արձանագրում, որ նա մի քանի անգամ հանդիպումներ է ունեցել ցուցարարների ներկայացուցիչների հետ, լսել նրանց պահանջները և այդ պահանջների վերաբերյալ մտահոգությունների վերաբերյալ ձեռք են բերվել կոնկրետ պայմանավորվածություններ: Արցախի նախագահն ասել է, որ պատրաստվում է ի կատար ածել այդ պայմանավորվածությունները, իրականացնել լրիվ և ամբողջական քննություն և դրանից անել նաև կազմակերպչական հետևություններ»:
Այնուհետև, Փաշինյանն ասում է՝ հիմա եկել է մի փուլ, որ ցուցարարները պետք է Արցախի նախագահին հնարավորություն տան, որ այդ պայմանավորվածություններն իրականացնի: «Ակնհայտ ու հասկանալի է, որ այդ պայմանավորվածությունները պետք է իրագործվեն հանդարտ, ոչ նյարդային իրավիճակում: Իսկ շարունակական իրավիճակը, որի նպատակը հենց որոշակի կադրային և կազմակերպչական հետևություններ անելն է, ըստ էության ստացվում է, որ խոչընդոտում է այդ հետագա պրոցեսների զարգացմանը»:
Փաշինյանի խոսքով՝ «Եթե պայմանավորվածությունները ի կատար չեն ածվեն, այդ դեպքում իմաստ կունենա շարունակել որևէ բողոքի գործողություն, որովհետև, ըստ էության, Արցախի իշխանությունը հայտարարում է, որ շատ տրամաբանական է համարում, որ տվյալ իրավիճակում պետք է հետևություններ արվեն և ցուցարարների և ներկայացուցիչների միջև ձեռք է բերվել համաձայնություն»:
Ահա, Փաշինյանը կոչ արեց ցուցարարները դադարեցնել ցույցը և հնարավորություն տալ, որպեսզի Արցախի իշխանությունները իրականություն դարձնեն հենց ցուցարարների ներկայացուցչների և իշխանությունների ներկայացուցիչների միջև ձեռք բերված պայմանավորվածությունները: Ընդ որում, նա մի քանի անգամ հասկացրեց, որ Արցախի նախագահն իր հետ խոսակցության ընթացքում նա արձանագրել է իր հավատարմությունը և հաստատակամությունն այդ պայմանավորվածությունների նկատմամբ, հետևաբար, անհրաժեշտ է այդ հնարավորությունը տալ Բակո Սահակյանին:
«Ցույցը արվում է, որ հասնեն ինչ-որ կոնկրետ արդյունքների: Հիմա կա պայմանավորվածություն, որ այդ արդյունքները կլինեն, առաջիկայում ամբողջական հետաքննություն կլինի և կլինեն նաև որոշակի կազմակերպչական հետևություններ: Ըստ էության, ցույցը իր նպատակին հասել է, և կարծում եմ, որ հիմա այսպես ասած գնդակը Արցախի իշխանությունների դաշտում է: Հիմա ճիշտ կլինի, որ մեր հարգելի ցուցարարները գնդակը թողնեն Արցախի իշխանությունների դաշտում և եթե այդ իրավիճակը չհանգուցալուծվի այն պայմանավորվածությունների շրջանակներում, որ ձեռք է բերվել ցուցարարների և Արցախի իշխանությունների միջև, այդ պարագայում ցուցարարները նորից կարող են գնդակը հետ բերել իրենց դաշտ», նշեց Փաշինյանը:
Նրա խոսքով՝ «համաձայնությունը կայացել է՝ երկարատև, մանրամասն, հանդարտ, եղբայրական քննարկումների արդյունքում և հիմա կարծում եմ, որ պարզապես անհրաժեշտ է հնարավորություն տալ, որ այդ պայմանավորվածությունները համաձայնության մթնոլորտում ի կատար ածվեն և մենք այստեղ նույնպես ցույց տանք մեր ժողովրդի հարցերը սիրո և համերաշխության մթնոլորտում լուծելու պատրաստակամությունը: Մանավանդ, որ կարծում եմ, մենք բոլորս ընդունում ենք քաղաքացիների՝ կոնկրետ իրավիճակի նկատմամբ իրենց վերաբերմունքն արտահայտելու և այդ վերաբերմունքը կոնկրետ քաղաքական փոփոխության ձևով տեսնելու իրավունքը»: Վերջում էլ, Փաշինյանը ողջունեց Արցախի ժողովրդին՝ ասելով. «Սիրում եմ բոլորիդ, իմ սիրելի ղարաբաղցիներ, խոնարհվում եմ բոլորիդ առաջ, հպարտանում եմ բոլորովդ»:
Իհարկե, բողոքի ցույցը դադարեցնելու կոչը Փաշինյանի կողմից միանգամայն տրամաբանական ու գովելի է թվում: Բայց նրա ելույթում բավական վտանգավոր շերտեր կան: Նախ՝ նա մի քանի անգամ հասկացնել է տալիս, որ բացառապես ինքը կարող է ազդել Արցախում բողոքի ձայն բարձրացրած հասարակության վրա՝ նրանց ուղղորդելով: Բացի այդ, նա ցույց է տալիս, թե Բակո Սահակյանն ինքնուրույն չի կարող իրավիճակը հարթել, և միայն այն բանից հետո, երբ ինքը խառնվեց գործին՝ նոր իրավիճակը հարթվեց Արցախում:
Բացի այդ, Փաշինյանն իր ելույթում ակնհայտորեն Արցախի իրավապահներին է նսեմացնում՝ այն աստիճան, որ սրանից հետո նրանք ինչ-ինչ բացահայտումներ էլ անեն՝ նրանց ոչ ոք չի հավատալու: Նշանակում է, ցանկացած պահի իրավիճակը կրկին կարող է լարվել:
Հետաքրքրական էր, որ Փաշինյանն արձանագրեց, որ ցուցարարները պետք է գնդակը թողնեն իշխանությունների դաշտում: Այսինքն, ցանկանում է ասել, դուք հասել եք ձեր նպատակին, հիմա սպասեք՝ հենց իշխանություններն իրենց խելոք չպահեն՝ նորից՝ «դուրս արի փողոց»:
Այսպիսով, ուշագրավ օպերացիա իրականացրեց Արցախում: Այսուհետև, ցանկացած կարևոր հարցում որոշում կայացնելիս Արցախի իշխանությունները պետք է հաշվի նստեն Փաշինյանի գործոնի հետ, մի բան, որի նպատակն էլ հենց ուներ Փաշինյանն ու նրան սատարողներն ու անվերապահ փառաբանողները: Ինչ խոսք, Արցախն ամրացնելու հարցում բավական «յուրահատուկ» մոտեցում է:
Թամար Բագրատունի
