Ուկրաինայում բռնության ենթարկված վանաձորցի Սյուզին անելանելի վիճակում է. նրանից խլել են մանկահասակ երեխային
Դիտումներ ` 1878
Վանաձորցի տիկին Անահիտն ահազանգում է, որ հայ երիտասարդի հետ ամուսնացած ու Ուկրաինայի Խարկով քաղաք տեղափոխված դուստրը բռնության զոհ է ու օգնության կարիք ունի:
«7 տարի է, ինչ ամուսնացած են ու այս բոլոր տարիների ընթացքում աղջկաս՝ Սյուզիի, ամուսինն ու նրա ընտանիքը անընդհատ ֆիզիկական ու հոգեբանական բռնության են ենթարկում»,- մեզ հետ զրույցում նշեց աղջկա մայրը:
Օրեր առաջ՝ հունվարի 4-ին բռնության հերթական դեպքից հետո Սյուզին երկու փոքրիկ երեխաների հետ հայտնվել է դրսում: «Սկեսրայրս մեզ տնից դուրս արեց, ասաց՝ սա իմ տունն ա, դուրս եկեք տնից: Նույնիսկ երեխեքին չհասցրի տաք հագուստ հագցնեմ»,- NEWS.am-ի թղթակցի հետ զրույցում պատմեց երիտասարդ մայրիկը:
Գնալու տեղ չունենալով վերջինս երկու երեխաների հետ ժամանակավորապես ապաստանել է բռնության ենթարկված կանանց համար նախատեսված ապաստարանում: Ամուսինը, սակայն, նրա տեղն իմանալով ու երեխաների հետ հանդիպում պահանջելով, հանդիպման պահին մոր գրկից խլել է կրտսեր որդուն ու արագ տարել:
Ժամեր անց Սյուզին տեղեկացել է, որ փոքրիկը ծայրահեղ հյուծված վիճակում տեղափոխվել է քաղաքի հիվանդանոցներից մեկի վերակենդանացման բաժանմունք: Որդու հիվանդանոցում հայտնվելու մասին լուրն իմանալուն պես Սյուզին շտապել է հիվանդանոց:
Ամուսինն ու նրա ընտանիքի անդամները, սակայն, մորը թույլ չեն տվել տեսնել երեխային, ով ընդամենը 1 տարեկան 10 ամսական է:
Սյուզին դիմել է իրավապահ մարմինների օգնությանը, տեղեկացրել, որ ամուսինն իրեն զրկել է երեխային տեսնելու իրավունքից: Իրավապահ մարմինները, սակայն, չեն շտապում դիմել կոնկրետ քայլերի:
Սյուզին հիմա միայն մի բան է ուզում. ամուսնալուծվել ու երեխաների հետ վերադառնալ հայրական տուն: Սա անելու համար, սակայն, նա ֆինանսական ու իրավաբանական աջակցության կարիք ունի:
Նրանք, ովքեր կցանկանան աջակցել Սյուզինն, կարող են դրամական փոխանցումներ կատարել Անահիտ Աբգարյանի անվամբ Յունիբանկի հետեւյալ հաշվեհամարով՝ 24100374566872, իսկ իրավաբանական օգնության համար զանգահարել 043230235 հեռախոսահամարով:
Նյութի աղբյուրը` Yelaket.am
