Երեկ Բադալ Մուրադյան 7-րդ շենքի բնակարաններից մեկում հոսանքահարված 11 ամսական երեխայի կյանքին վտանգ չի սպառնում:
Նրա վիճակը գնահատվում է միջին ծանրության: Այս մասին մեր հարցին ի պատասխան ասացին ԵՊԲՀ մամուլի պատասխանատու Շուշան Դանիելյանը:
Երեկ ժամը 17:00-ի սահմաններում Երևանի 1-03 շտապօգնության հերթապահ խումբը ահազանգել է ոստիկանության Նոր Նորքի բաժին եւ հայտնել, որ կանչով մեկնել են Բադալ Մուրադյան 7-րդ շենքի բնակարաններից մեկը, որտեղ հայտնաբերել են կնոջ դի:
Նշված տանը հայտնաբերել են տանտիրուհու՝ 64-ամյա Ֆ. Ղ.-ի դին, իսկ նրա 11-ամսական տղա թոռանը՝ Ա. Պ.-ին, ծայրահեղ ծանր ախտորոշմամբ տեղափոխել էին Մուրացանի մանկական հիվանդանոց:
Դեպքի առթիվ ՀՀ քննչական կոմիտեում նյութեր են նախապատրաստվում: Քննչական կոմիտեի նախագահի խորհրդական Սոնա Տռուզյանը մեր զրույցում ասաց, որ նշանակվել է դատաբժշակական փորձաքննություններ: Նրա փոխանցմամբ՝ 64-ամյա կինը մահացել է վերին վերջույթի, աջ կրծքագեղձի եւ ձախ սրունքի շրջանում բազմաթիվ մոխրացած դարչնագույն վնասվածքներից, իսկ 11-ամյա թոռան մոտ հայտնաբերվել է ձախ սրունքի այրված վերք:
Նախնական տվյալներով, տանը դեպքի պահին տատն ու թոռը երկուսով են եղել. 64-ամյա տատիկը լոգարանի կողքի ննջասենյակում էլեկտրական սավան է դրել, որը մեր տեղեկություններով միացված է եղել, երեխային լողացնելուց հետո նրան դրել է սավանի վրա, ինչի պահին էլ տատն ու թոռը հոսանքահարվել են: Տատը տեղում մահացել է, քանի որ էլեկտրահարվել է կրծքավանդակի շջանում, իսկ փոքրիկը փրկվել է, քանի որ հոսանքը ոտքերից է դուրս եկել: Երեխան որեւէ այլ տրավմա չի ստացել, այսինքն՝ վայր չի ընկել: Ենթադրաբար՝ նա մնացել է անկողնու վրա պառկած: Թե կոնկրետ որ ժամին է եղել դեպքը եւ քանի ժամ է երեխան մնացել միայնակ մահացած տատի հետ նույն սենյակում, հայտնի չէ:
Ընտանիքի անդամները աշխատանքի են եղել, վերադառնալով չեն կարողացել տուն մտնել, դռան թակոցներին ոչ ոք չի արձագանքել եւ նրանք զանգահարել են իրավապահներին: